អភិបាលខេត្តកំពង់ធំ បានជំរុញអោយអាជ្ញាធរពាក់ព័ន្ធទាំងអស់ អនុវត្តការងារអោយមានប្រសិទ្ធភាពជូនប្រជាពលរដ្ឋ
21-December-2017 | ដោយ ពលមនសិការ
កំពង់ធំ ៖ នៅថ្ងៃទី២១ ខែធ្នូ ឆ្នាំ២០១៧ ឯកឧត្តម សុខ លូ អភិបាលខេត្តកំពង់ធំ បានដឹកនាំកិច្ចប្រជុំដោះស្រាយបញ្ហាដីធ្លី ដែលមានចំនួន ៧ករណី ទាំង ៨ក្រុង ស្រុកដែលមានបញ្ហារាំរ៉ៃកន្លងមក។
កិច្ចប្រជុំបានពិនិត្យ ពិភាក្សា និងឯកភាពគ្នាទៅលើការងារសំខាន់ៗមួយចំនួន ដែលអាជ្ញាធរពាក់ព័ន្ធត្រូវអនុវត្តនៅមូលដ្ឋានទាំង០៨ក្រុង-ស្រុក អោយមានប្រសិទ្ធភាព មានដូចជា៖ទី១- ការងារឆ្វៀលដីនៅតំបន់៣ និតំបន់២ សម្រាប់ប្រជាពលរដ្ឋអាស្រ័យផលជាក់ស្តែង ដោយជម្រុញការចេញសលាកបត្រព័ត៌មាន អោយដល់ដៃប្រជាពលរដ្ឋតាមស្ថានភាពជាក់ស្តែងនៃតំបន់នីមួយៗ ទី២- ការកំណត់ទំហំដីស្នើសុំ របស់ប្រជាពលរដ្ឋក្នុងតំបន់អភិរក្សសត្វខ្សឹប ដោយត្រូវពិនិត្យនិងដោះស្រាយជាក់ស្តែង៣- ការជំរុញការកាត់ដីជូនប្រជាពលរដ្ឋចេញពីបញ្ជីសារពើភ័ណ្ឌរបស់មន្ទីរ អង្គភាពមួយចំនួនក្នុងខេត្ត ទី៥- ការជំរុញការសម្របសម្រួលដោះស្រាយបញ្ហាដីធ្លី ជាក់ស្តែងជូនប្រជាពលរដ្ឋនៅក្នុងតំបន់អភិរក្ស
ប្រាសាទសំបូរព្រៃគុក ទី៦- ការជំរុញរៀបចំបង្កើតសហគមន៍សិប្បកម្មកែច្នៃឈើនៅឃុំចុងដូង ស្រុកបារាយណ៍ ទី៧- ការជំរុញការធ្វើអត្តសញ្ញាណប័ណ្ណសញ្ជាតិខ្មែរជូនប្រជាពលរដ្ឋ ពិសេសយុវជនទើបគ្រប់អាយុ គឺសំដៅឆ្ពោះទៅការបោះឆ្នោត ថ្នាក់ជាតិនៅឆ្នាំ២០១៨នាពេលខាងមុខ និងទី៨- ការជំរុញពិនិត្យ និងដោះស្រាយនូវសំណូមពររបស់ប្រជាពលរដ្ឋ ដែលទាក់ទងនឹងសាលារៀន ផ្លូវលំជនបទ ប្រព័ន្ធធារាសាស្ត្រ បញ្ហាសណ្តាប់ធ្នាប់និងអនាម័យសាធារណៈ ពិសេសការដោះស្រាយគំនរសំរាមតាមទីផ្សារដែលនាំអោយប៉ះពាល់ដល់សុខភាពរស់នៅរបស់ប្រជាពលរដ្ឋ និងពង្រឹងការផ្តល់នូវ
សេវាសាធារណៈជូនប្រជាពលរដ្ឋអោយបានលឿន ឆាប់រហ័ស និងមានតម្លាភាព។
ឯកឧត្តម សុខ លូ បានណែនាំអោយអាជ្ញាធរមូលដ្ឋានគ្រប់លំដាប់ថ្នាក់ បន្តយកចិត្តទុកដាក់គិតគូរ ពិនិត្យនិងដោះស្រាយនូវរាល់បញ្ហាប្រឈម និងសំណូមពរចាំបាច់នានាដែលកើតមានឡើងនៅមូលដ្ឋានក្រុង-ស្រុកទាំង០៨ អោយបានទាន់ពេលវេលា និងមានប្រសិទ្ធភាព សំដៅធ្វើអោយប្រជាពលរដ្ឋមូលដ្ឋានមានភាពកក់ក្តៅ ជឿជាក់ និងទុកចិត្តមកលើរាជរដ្ឋាភិបាល និងរដ្ឋបាលមូលដ្ឋាន៕
ចំនួនអ្នកទស្សនា
- ថ្ងៃនេះ8851
- ម្សិលមិញ10851
- សប្តាហ៍នេះ75371
- ខែនេះ190521
- ឆ្នាំនេះ190521
- សរុប20632977